انطباعي عن اول حلقات مسلسل ازمه منتصف العمر ٢٠٢٣
بدأ عرض مسلسل ازمه منتصف العمر علي منصة شاهد من يومين و اتوفر منه لحد الآن ٣ حلقات.
قصة مسلسل أزمة منتصف العمر
المسلسل بيحكي عن قصة فيروز اللي بتتجوز راجل أكبر منها في السن بفرق كبير و بتلاقي نفسها مفتقده للحياة الزوجية الناجحه وللحب و بعد فترة بتلاقي الزمن بيعيد نفسه مع بنتها و إنها بتتجوز لشاب أكبر منها في السن .. لكن السيناريو هيتكرر تاني ؟ ولا فيه قصه جديدة هتحصل من الاحداث دي ؟
نوعيه مسلسل أزمة منتصف العمر
المسلسل بينتمي لنوعية الاعمال الدرامية .. ومن خلال اول الحلقات الجرعة الدرامية متقدمة بشكل كويس جداً و فيها عرض لابعاد الشخصيات كلها و تمهيد للصراعات اللي هتحصل في الحلقات الجاية رغم إنها متوقعة لكن اجواء المسلسل فيها جرعة توتر رهيبة تخليك مستني إيه اللي هيحصل وتشوف بنفسك.
ملحوظه سريعه
يمكن الملحوظة الوحيدة اللي مكنتش حابب إنها تظهر بالشكل دة إن كل العلاقات اللي في المسلسل فيها مشاكل و سودوية و كإن فكرة نجاح علاقة واحدة في الدنيا شئ مستحيل .. يمكن ملحوظتي سابقة اوانها و يحصل حاجات مختلفه بعد كدة .. غير كدة الكتابة معمولة بشكل جيد جداً.
اداء ريهام عبد الغفور
و علي مستوي الاداءات التمثيلية فطبعاً ريهام عبد الغفور مش محتاجين نقول قد إيه هي تفوقت مؤخراً في مسلسلات شاهد بشكل ملحوظ ومتطور و قوي جداً .. و رغم ان ادوارها كلها تعتبر درامية في المقام الاول لكن كل شخصيه بتتقدم بشكل مختلف و ابعاد اعمق و اصعب من اللي قبلها .. وممكن نقول إن شخصيه فيروز تعتبر أصعب شخصيه بتقدمها مؤخراً من حيث الصراعات النفسية اللي بتواجهها.
اداء كريم فهمي
اداء كريم فهمي الحقيقة مفاجاة حلوة جداً في المسلسل .. و نفس الكلام اللي اتقال علي شخصيه ريهام ينطبق علي دور كريم فهمي ، دور مركب وصعب و محتاج ممثل شاطر علشان يقدر يوصلهُ بالشكل المطلوب.
الادوار المساندة في مسلسل أزمة منتصف العمر
و كل الادوار المساندة طبعاً لاسماء كبيرة كلنا عارفين موهبتهم جداً علي رأسهم الاستاذ رشدي الشامي و الدور المختلف والجريئ لركين سعد .. اللي اكيد هيكون غير كل الادوار اللي عملتها قبل كدة.
خلاصة مسلسل أزمة منتصف العمر
لحد دلوقتي ممكن نقول إن المسلسل تفوق علي التوقعات اللي كنت حاطتهاله و اتمني جداً إنه يستمر بالقوة دي أو يزيد مع تتابع الاحداث و زيادة الصراعات فيه.
مشاهدة ممتعة.